Resultaten iepenstelling Iepen Mienskipsfûns Ferduorsumjen

It nije Iepen Mienskipsfûns (2024 -2027) bestiet út trije ûnderdielen: reguliere oanfragen, de Fryslân Ferbynt Dei (rjochte op it behâld en oanlûken fan frijwilligers) en it ferduorsumjen fan mienskipsgebouwen yn eigendom fan stichtingen en ferieningen. 

Beoardieling 

Oanfragen waarden dêrnei beoardiele troch aktive en belutsen ynwenners fan Fryslân mei dêryn ferskate ferieningsbestjoerders, in ynstallateur en in ferduorsumingsadviseur. De projektfoarstellen waarden beoardiele op: 

1. ferduorsuming - wat dogge se mei de subsydzje en hoe effektyf binne de maatregels?
2. besparring jierlikse kosten – hoe bot wurdt de feriening/stichting finansjeel sûner fan dit projekt?
3. Mienskipswearde: hokfoar rol spilet it gebou yn it doarp of yn ’e wyk? 

It beoardieljen oan ’e hân fan dy kritearia levere in lange list fan projekten op, wêrby't de projekten mei de measte punten subsydzje krije en sa troch nei ûnderen oant de pot leech is. 

Utslach 

Mar leafst 36 projekten koene dizze perioade fan subsydzje foarsjoen wurde. Op in inkeling nei fregen alle ferieningen en stichtingen €35.000,- oan wat maksimaal 50% fan de totale kosten fan it projekt wêze mocht. 

Deputearre Sijbe Knol seit dêroer: “Mei dizze subsydzje binne ús mienskipsgebouwen by steat om de enerzjyrekken yngripend nei ûnderen te bringen. Goed foar it takomstbestindich meitsjen fan ús tsjerken, sportklups en doarpshuzen.” 

Yn novimber 2025 giet it fûns noch ien kear iepen foar it ferduorsumjen fan Mienskipsgebouwen.