Alde Feanen
Natuergebiet de Alde Feanen leit midden yn de provinsje Fryslân en falt binnen trije gemeenten: Smellingerlân, Ljouwert en Tytsjerksteradiel. It bestiet foar in grut part út leechfeanmoeras mei marren, feanplassen, petgatten, trilfeanen, reidlannen, healannen en moerasbosken. It natuergebiet hat seldsume floara en fauna. Dêrom is it oanmurken as Natura 2000 gebiet en ûnderdiel fan it Natuurnetwerk Nederland (NNN ). It is ek ûnderdiel fan Nasjonaal Park De Alde Feanen.
De Alde Feanen is in natuergebiet wêryn 't meardere funksjes gearkomme: wetter, lânbou, natuer en rekreaasje. It stribjen is dat dizze funksjes inoar gjin oerlêst besoargje, mar krekt njonken en mei-inoar bestean. Binnen de gebietsûntwikkeling Alde Feanen binne en wurde maatregels útfierd dy 't sawol de natuer as de belibbing fan de Alde Feanen fersterkje.
Op dizze webside lêze jo mear oer de ûntwikkelingen binnen de gebietsûntwikkeling Alde Feanen. Wat is der al útfierd en wat komt der noch? Fierder lêze jo mear oer de taken fan de gebietskommisje en wa 't deryn sitte.
Maaie 2024: Natuerûntwikkeling yn polder Siderius by Earnewâld(4e module)
Yn polder Siderius by Earnewâld wurdt 36 bunder natuer realisearre yn 2024. Dat stiet yn de 4e útfieringsmodule Alde Feanen, wêrmei't it kolleezje fan Deputearre Steaten op 23 april ynstimd hat. Yn dizze module wurde maatregels tsjin ferdrûging foarsteld dy't ek ekstra natuerûntwikkeling mooglik meitsje.
It giet om it gebiet krekt foar de yngong nei Earnewâld, oan de linkerkant fan de Feantersdyk, tusken de Alle om 'e Slachte en de Koaidyk. In noch ûntbrekkende skeakel yn de ferbining fan natuer om Earnewâld hinne. Mei de ynrjochting fan dit gebiet ûntstiet in gehiel mei hegere wetterpeilen, goed foar it behâld fan it fean en de dêrby passende natuer.
Winterdeis kinne de legere dielen langere tiid ûnder wetter stean. Dêr kin oerstreamingsgerslân ûntstean. Op de hegere plakken, mear lizzend op de flanken fan de sânrêgen, kin mei it ôfgraven fan in part fan de boppegrûn de goede omstannichheden kreëarre wurde foar de ûntwikkeling fan wiet skraallân. De rest fan it terrein wurdt fochtich-drûch krûde- en faunaryk gerslân.
De 4e útfieringsmodule is opsteld troch de gebietskommisje Alde Feanen, yn opdracht fan de provinsje Fryslân. De gebietskommisje wurket yn dizze module gear mei de ûnder oare de provinsje Fryslân, Wetterskip Fryslân, de gemeente Tytsjerksteradiel en It Fryske Gea (as tydlik behearder fan it gebiet).
Utkomsten archeologyske ûndersyk yn polder Siderius
Yn febrewaris en maart 2024 is, yn opdracht fan de Provinsje Fryslân, in archeologysk fjildûndersyk útfierd yn polder Siderius. Dit is it gebiet fan de 4e útfieringsmodule, lein tusken de Alle Om 'e Slachte, Koaidyk en Feansterdyk.
It archeologysk boaiemûndersyk is dien om 't op de Fryske Archeologyske Monumintekaart (FAMKE) oanjûn is dat hjir resten wêze kinne fan bewenning út de stientiid / boarnestiid en de midsiuwen. Dizze ferwachting is basearre op de sânrêgen yn de ûndergrûn en de betide feanûntginning.
Earst is in ferkennend boarûndersyk dien. Dêrby is it hiele plangebiet ûndersocht. Dêrnei is op guon lokaasjes noch ferfolchûndersyk dien.
Konklúzje: op de lokaasjes dêr 't groeven wurde sil by de werynrjochting fan it gebiet (foar de natuerûntwikkeling ), binne gjin archeologyske resten.
Mochten der by it útfieren fan graafwurksumheden dochs losse spoaren en fynsten oantroffen wurde - it giet dan faak om lytse spoaren of resten dy 't net mei in boarûndersyk opspoard wurde kinne - dan sil dêr melding fan makke wurde by de provinsjaal archeolooch.
Wolle jo mear witte oer it ûndersyk dat útfierd is en de útkomsten dan kin it rapport hjir lêze.
Mear ynformaasje oer de Friese Archeologische Monumentenkaart (FAMKE)
Werstel healannen Oksekop
De Oksekop is in “boesemlân” yn de Wide Ie. It is in saneamde simmerpolder, dy't winterdeis ûnder wetter stie as it wetter yn de boezem heech stie. Simmerdeis wie it drûch genôch om hea te rispjen. Yn dizze “fochtige hooilannen” troffen wy bysûndere floara en fauna oan lykas de Gewone Dotterbloem en ferskate soarten greidefûgels. Troch ferskate redenen, lykas it ferleegjen fan de grûnwetterstân, binne dizze “fochtige hooilannen” yn Fryslân en de rest fan Nederlân ferdwûn. Dêrom fine wy it wichtich om de Oksekop wer geskikt te meitsjen as gebiet foar “fochtig Hooilân” en de dêrby hearrende floara en fauna.
Wat sille we dwaan? De gehiel tichtgroeide Alde Mûntsegroppe wurdt útgroeven. De wetter yn- en útlitten wurde ferbettere. Ek wurde de beammen en strûken fuorthelle om de greidefûgels te beskermjen tsjin rôffûgels en oare predatoaren.
De grûn is yn eigendom fan partikulieren, wêrfan in part by It Fryske Gea. De eigeners sille tastimming jaan moatte foar it útfieren fan dit wurk. Hja binne fansels behelle by de planfoarming en de fierdere útwurking.
Om't de ferfanging fan de kade lâns de Nije Mûntsegroppe op de planning fan Provinsjale Wettersteat stiet foar 2024, is de gearwurking yn beide projekten socht. Provinsjale Wettersteat wol in natuerfreonlike wâl oanlizze om de hjoeddeistige steile kademuorre te ferfangen. Ek dit wurdt mei de grûneigeners bepraat.
Nijsbrief
Lês de meast resinte nijsbrief fan july 2023 oer de lêtste ûntwikkelingen.
Wolle jo op 'e hichte bliuwe fan nijs oangeande de gebietsûntwikkeling? Meld jo oan foar de digitale nijsbrief.
Funksjeferoaring
In wichtich ûnderdiel fan de gebietsûntwikkeling is it omfoarmjen fan lânbougrûn nei natuer yn de dêrfoar beheinde gebieten yn it NNN. Dat kin op ferskate wizen, bygelyks troch oankeap of it ruiljen fan grûn, mar ek kinne eigeners sels kieze foar omskeakeling nei natuer, de saneamde funksjeferoaring. Binnen de gebietsûntwikkeling wurdt wurke op basis fan frijwilligens. Dat betsjut dat in eigener sels beslút oft hy dêroan meiwurkje wol of net.
Klik hjir om de ôfbielding te fergrutsjen.
It begûn mei it Raamplan Werynrjochting Alde Feanen
De Werynrjochtingskommisje makke tusken 1997 en 2004 it Raamplan Herinrichting Alde Feanen yn opdracht fan de provinsje Fryslân. Deputearre Steaten stelde it yn 2004 fêst. Yn it Raamplan stiet wat de doelen foar it gebiet binne en wat de winske maatregels binne om de doelen te heljen. De opdracht fan Deputearre Steaten oan de gebietskommisje wie: Ontwikkel in folweardich laachfeanmoeras dat oanstjoerd wurdt troch in optimaal wetterbehearsysteem. Binnen dit systeem moat romte wêze foar rekreatyf meigebrûk. De gebietskommisje fiert it ramtplan út troch it yn stikken op te dielen. Dy ûnderdielen hjitte útfieringsmodules.
Earste útfieringsmodule: It Pettebosk
De earste útfieringsmodule (2008) bestie út de oanlis fan it natueredukaasjebosk It Pettebosk. Dit is in stikje natuer binnen De Alde Feanen mei in boartersbosk mei reidfjilden, boartersgreide en moerasbosk. Eins is it de Alde Feanen yn it lyts sadat bern boartsjendewei yn de kunde komme kinne mei de natuer. Yn de natuerboarterstún is in útdaagjende rûte útset foar bern mei ferskate toubrêgen, klimpalen en in survivalbaan.
Twadde útfieringsmodule: Petgatten, farwegen en kuierpaden
Yn de twadde útfieringsmodule (2010 -2014) binne der nije petgatten noardlik en noardeasten fan Earnewâld kaam. Yn totaal suveret no sa 'n 400 bunder oan moeras - en petgatten it wetter út de Fryske boezem wei. Fierder wiene de maatregels rjochte op it ferminderjen fan ferdrûging, nije mooglikheden foar natuerûntwikkeling, wetterpeilen op maat en wetterberging en wetterkwaliteit. Dêrneist binne de farwegen foar lytse rekreaasjefeart útwreide en binne besteande kuierpaden opknapt.
Tredde útfieringsmodule: tsjingean ferdrûging
Ek yn de tredde útfieringsmodule (2014 -2023) is it tsjingean fan ferdrûging fan it bysûndere leechfean yn de Alde Feanen in wichtich doel. Behâld en fierdere ûntwikkeling fan de besteande natuergebieten stiet sintraal. En dêrneist foarsjenningen dy 't it mooglik meitsje om fan it gebiet te genietsjen. De tredde útfieringsmodule omfettet hast 600 bunder en is no yn útfiering. Op de kaart hjirûnder wurde de maatregels yn it koart beskreaun. Foar mear ynformaasje kinne jo it rapport ynsjen.
Klik hjir foar in grutte ôfbylding
Tredde útfieringsmodule: wurk yn 'e simmerpolders klear
Kontakt
Hawwe jo fragen oer gebietsûntwikkeling Alde Feanen? Dan kinne jo it klantkontaktsintrum fan de provinsje Fryslân telefoanysk berikke op telefoannûmer 058 - 292 59 25, of in mail stjoere nei provincie@fryslan.frl.
Dokumint
Hawwe jo problemen mei de lêsberens? Dan kinne jo in formulier ynfolje of belje mei it Klantkontaktsintrum. Sy helpe jo graach fierder.