Ôfstânsbetsjinning brêgen
Hieltyd mear provinsjale en gemeentlike brêgen yn Fryslân wurde op ôfstân betsjinne troch provinsjale brêgewachters. Dat betsjut, dat brêgewachters hieltyd minder faak op ’e brêge sels sitte, mar dy betsjinje fan in oare lokaasje ôf.
Wêrom de brêge betsjinje op ôfstân?
As wettersportprovinsje wolle wy in goede gasthear wêze, dêrom wurkje wy oan:
- It opinoar-ôfstimmen fan iepeningstiden fan brêgen en slûzen
- It ôfskaffen fan brêgejild
- It ôfskaffen fan ’e middeisskoften by it betsjinjen fan ’e brêgen
Dat berikke wy troch mear brêgen effisjinter te betsjinjen út in sintrale betsjinnerslokaasje wei. Troch ek brêgen fan gemeenten te betsjinjen, kinne rûtes sûnder brêgejild en tuskenskoften fearn wurde. Wy rjochtsje ús dêrby op wichtige en trochgeande of ferbinende rûtes.
Wat fernimst as wettersporter?
Op it wetter kinst, krekt as by brêgen dy’t lokaal betsjinne wurde, dy oanmelde foar it iepenjen fan ’e brêge fia in oanmeldknop by it wachtplak of fia de marifoan. In ekstra service is dat it oanmelde by brêgen dy op ôfstân betsjinne wurde ek kin fia de app Wettersport. De brêgewachter sjocht fanút it betsjinnerssintrum wei yn in soad gefallen de boaten al oankommen. Alle provinsjale brêgen binne frij fan brêgejild en skoftsjen. In soad gemeentlike brêgen binne ek frij fan brêgejild en skoftsjen.
Wat fernim ik as ferkearsdielnimmer?
Autoriders en fytsers sjogge dat der gjin brêgewachter mear op ’e brêge sit. De brêgewachter sjocht it ferkear op ’e dyk troch middel fan kamera’s. Fierder is der amper ferskil. Der wurdt net faker, langer, flugger of stadiger betsjinne. By it op ôfstân betsjinjen stribje wy der ek nei om ’e wachttiden foar it ferkear op ’e dyk en op it wetter te beheinen. It is fan grut belang dat it ferkear op ’e dyk de knipper- en stopljochten foar de brêge sjocht en dêr yntiids op reagearret. De betsjinner kin it bewegen fan ’e slachbomen en brêge ophâlde litte, as dêr oanlieding ta is. Om blinen en minsken dy’t min sjen kinne te warskôgjen foar’t de brêge iepengiet, is der altyd koart in belle te hearren. Dat jildt sawol foar brêgen dy’t op ôfstân betsjinne wurde as foar brêgen dy’t lokaal betsjinne wurde.
Wat fernimme jo as omwenjende?
Wenje jo tichteby in brêge dy’t oergiet op ôfstânsbetsjinning? Kollega’s fan ’e provinsje sille jo dêr yntiids oer ynformearje. Dan komt op ’t aljemint watfoar oanpassings oft oan ’e brêge dien wurde, wêr’t kamera’s en kameramêsten pleatst wurde en wat oft wy op ’e bylden sjogge. It kin nedich wêze dat de wachtplakken oanpast wurde of om nije sprek- en harkapparatuer te ynstallearjen. It is mooglik om in besite te bringen oan ’e betsjinnersssintrale. Jo kinne dan sels mei sjen mei de betsjinner. De brêgewachtershokjes ferdwine, of der moatte oerwagings wêze om se dochs stean te litten.
Kamera’s
In brêge kin feilich op ôfstân betsjinne wurde mei kamera’s dy’t de rydbaan en ’e farwei goed yn byld bringe. Wy brûke gjin kamera’s dy’t ynsûmje of draaie. Privacygefoelige ûnderdielen wurde blokt. Wol bewarje wy bylden tydlik om dy rieplachtsje te kinnen by bygelyks ynsidinten of skea. Nei 7 dagen wurde de bylden wiske.
Hokker brêgen geane oer op ôfstânsbetsjinning?
Besjoch de kaart op www.fryslan.frl/swettehus
Wat fernimme je as wettersporter?
Op it wetter kinst krekt as by lokaal betsjinne brêgen, dy oanmelde foar in brêge-iepening fia in oanmeldknop by it wachtplak of fia de marifoan. In ekstra service is dat it oanmelden by brêgen dy't op ôfstân betsjinne wurde ek kin fia de app Watersport. De brêgewipper sjocht fanút it betsjinningssintrum de boaten yn in soad gefallen al oankommen. Alle provinsjale brêgen binne frij fan toljild en skoft. In soad gemeentlike brêgen binne ek frij fan toljild en pauzes.
Wat fernimst as weibrûker?
Automobilisten en fytsers sjogge dat der gjin brêgewipper mear op de brêge oanwêzich is. De brêgewipper sjocht it ferkear op de brêge mei kamera's. Fierder is der amper ferskil. De betsjinning is net faker, langer, flugger of stadiger. By ôfstânsbetsjinning stribje wy der ek nei om de wachttiden foar weiferkear en farweiferkear te beheinen. It is fan grut belang dat dykferkear de knipperljochten en stopljochten foar de brêge sjocht en dêr ek op 'e tiid op reagearret. De betsjinner kin de beweging fan slachbomen en brêge stopje wannear 't dêr oanlieding ta is. Om blinen en minsken dy't min sjogge te warskôgjen foar in iepening is der altyd in koart belsinjaal op in brêge te hearren, dat jildt foar brêgen dy't op ôfstân betsjinne wurde as by lokale betsjinning.