Eksperimint ûnkrûdbestriding yn sûkerbitetylt
Yn 2024 is in twajierrich eksperimint úteinset yn de sûkerbitetylt. SPNA Agroresearch fiert dit tegearre mei de Nederlandse Akkerbouwers Vakbond (NAV) en LTO Noord út, yn opdracht fan de provinsje Fryslân. It doel is om agraryske ûndernimmers ynsjoch te jaan yn ferskate metoaden om sûkerbiterselen ûnkrûdfrij te hâlden. Dêrby stiet it ferminderjen fan gebrûk fan gewaaksbeskermingsmiddels foarop.
Trije ferskillende metoaden
Foar it eksperimint binne trije metoaden mei-inoar ferlike. De reguliere gemyske bestriding (as referinsje), it ûnkrûdfrij hâlden fan perselen mei kameraazjestjoerde skoffeltechnyk en plaats-spesifike gemyske bestriding mei in spotsprayer. By dy lêste technyk detektearret in kamera in ûnkrûdplant en wurdt der rjochte bespuite.
Resultaten
By de reguliere, gemyske bestriding kaam de groei fan de biten wat stadiger op gong. De brûkte boaiemherbisiden (produkt om túch fia de boaiem te bestriden) kamen ek by de woartels fan de biten, wêrtroch't de blêden wat giel waarden. Letter lutsen de biten goed by en wie de groei normaal.
By it stik grûn dêr't skoffele is, kaam de groei fan de biten goed op gong. Troch it wiete waar wie it net mooglik om faak genôch te skoffeljen wêrtroch't der úteinlik in soad ûnkrûd groeide. Dat kaam de kwaliteit fan de biten net te'n goede.
Foar de plak-spesifike bestriding jildt itselde as it skoffeljen: dat wurket goed, mar allinnich as it mooglik is om regelmjittich mei de spotsprayer it fjild yn te gean. It wiete waar makke dat dreger.
Wiete maitiid
De wiete maitiid yn 2024 makke it eksperimintearjen mei de ferskate metoaden lestich. De sûkerbiten koene pas let siedde wurde. Ek makke it tal rein de tagong ta de perselen dreger. Dat makket dat der no noch gjin hiele stevige konklúzjes te lûken binne. It eksperimint krijt in ferfolch yn 2025, hooplik mei bettere waarsomstannichheden, om op'e nij de metoaden mei elkoar te fergelykjen.
Gearkomsten en mear ynformaasje
Ferline jier binne der fjild - en temabyienkomsten organisearre om bouboeren, omwenners en ynteressearren te ynformearjen oer it eksperimint. Dêr kaam in soad publyk op ôf. Ek yn 2025 folgje der sokke gearkomsten.
Op'e hichte bliuwe fan dit eksperimint en oankommende gearkomsten? Dat kin fia de webside fan SPNA.