Trije dialoochgearkomsten oer gewaaksbeskermingsmiddels yn Fryslân
Teun de Jong (bouboer) en Jochem Knol (Steatelid Grienlinks) organisearje trije dialoochgearkomsten oer gewaaksbeskermingsmiddels de kommende tiid.
De gearkomsten binne bedoeld om yn petear te gean oer de soargen oer gewaaksbeskermingsmiddels en om te sjen hoe't der tegearre oan konstruktive oplossings wurke wurde kin.
Utnûgingstekst:
Yn de agraryske sektor wurde sûnt jier en dei gewaaksbeskermingsmiddels brûkt. Omwenners meitsje harren hieltyd mear soargen oer dat gebrûk. It is fan belang dat bedriuwen en omwenners mei-inoar yn petear gean en besykje om begryp foar elkoar op te bringen. En te kommen ta mienskiplik begryp en sykjen nei mienskiplike oplossingen. Sa’n dialooch is in bydrage oan it plezierich gearlibjen yn ús moaie Fryske provinsje.
De dialooch set útein mei in bydrage fan mw. Dr. Aleid Dik, Plantenziektenkundige en spesjalisearre yn net-gemyske gewaaksbeskerming. Sy sil yngean op de easken foar gebrûk en oan de brûkers fan gewaaksbeskermingsmiddels. De soargen fanút bewenners wurde ferwurde troch Hans van der Werf, direkteur fan de Fryske Miljeufederaasje. Hy sil dêrby koart yngean op de lêste romtlike ûntwikkelingen en fragen fan omwenners en ferûntrêste boargers dy't by harren binnenkomme.
Nei oanlieding fan dy bydragen kinne de oanwêzigen fragen stelle en ûnderling yn debat gean. De dialooch stiet ûnder lieding fan ûnôfhinklik moderator Wigle Sinnema.
Datums en lokaasjes:
De trije gearkomsten binne pland op:
- 17 maart yn it Fries Landbouw Museum, Felling 6, 8912 CG Ljouwert
- 31 maart yn it Biosintrum, Ecomunitypark 5, 8431 SM Easterwâlde
- 7 april yn Zalencentrum’t Haske, Vegelinsweg 20, 8501 BA Joure
De gearkomsten begjinne om 19.30 oere, oant uterlik 22.00 oere. De sealen binne fan 19.00 oere ôf iepen. De entree is fergees en oanmelde is net nedich.